Заканчваюць збіраць подпісы і ствараюць участковыя камісіі

Напечатать Отправить ссылку RSSОбсудить на форуме

Мінулы тыдзень для сёлетняй выбарчай кампаніі стаў адметны тым, што ініцыятыўныя групы закончылі збіраць подпісы выбаршчыкаў у падтрымку сваіх вылучэнцаў, а ўлады павінны былі стварыць участковыя камісіі.

Подпісы некаторыя прэтэндэнты на кандыдаты ў дэпутаты мясцовых Саветаў 26-га склікання збіралі таксама і асабіста. З адным з іх карэспандэнт “ГС” у мінулую суботу наведаў кватэры выбаршчыкаў у доме №29/1 на Тапалёвай вуліцы ў Слоніме.

— Што вы чакаеце ад Слонімскага раённага Савета дэпутатаў, які мы павінны абраць гэтай вясной? — пытаўся карэспандэнт “ГС” у жыхароў першага пад’езда дома.

— Я думаю, што і будучыя дэпутаты, і цяперашнія нічога значнага зрабіць для горада ці раёна не змогуць. Няма ў іх для гэтага сродкаў і магчымасцяў. Можа, пасадзейнічаюць, каб лямпачкі ў пад’ездах своечасова мяняліся ці дарогі на вуліцах і ў дварах нашых дамоў рамантавалі, — выказаў сваё меркаванне Мікалай Ляшэвіч.

Другі жыхар дома, Міхаіл Сакалоўскі, сказаў, што іх праблемы мясцовы дэпутат можа дапамагчы вырашыць настолькі, наколькі ў яго хопіць настойлівасці. А для гэтага, на думку спадара Сакалоўскага, трэба, каб дэпутатам быў малады і энергічны чалавек.

Гаспадар адной з кватэр, Сяргей, зазначыў, што вырашэнне праблемаў нават іх дома ці мікрараёна ад дэпутатаў не залежыць, а гэтыя выбары — “звычайная хадзьба па коле”.

— Ад дэпутатаў я чакаю добрай працы, а свае праблемы я сам вырашу, — адказаў на наша пытанне Уладзімір Папоў.

— Вельмі мяне хвалюе стаянка машын пад вокнамі. Ездзяць маладыя і ў гадзіну, і ў тры ночы, газуюць, сігналяць, музыку ўключаюць. І экалогія парушаецца. Вось каб дэпутаты прынялі такі закон, каб машыны нам не перашкаджалі адпачываць, то добра было б, — зазначыла сталая жанчына Данута Воршчык.

Адна з жыхарак пад’езда сказала, што яна не ведае, “куды гэтыя выбары”, але ўпэўнена, што ніякія выбары нічога цяпер не вырашаюць у краіне.

На другое наша пытанне: “Ці ведаеце вы цяперашняга свайго дэпутата?” — толькі двое адказалі, што гэта жанчына, што яны з ёй сустракаліся, але не памятаюць дакладна, як тую завуць.

З 36 кватэр у пад’ездзе дзверы нам адчынілі ў 20, восем чалавек паставілі свой подпіс у падтрымку прэтэндэнта на кандыдата ў дэпутаты, два чалавекі адмовіліся, а ў астатніх не аказалася пад рукой пашпарта.

Агульнае ўражанне — людзі там жывуць добразычлівыя, ад бліжэйшых выбараў нічога асабліва не чакаюць, але кажуць, што ўдзельнічаць у іх хутчэй будуць, чым не.

Тым часам выканкам павінен прыняць рашэнне аб стварэнні ўчастковых выбарчых камісій. Па словах старшыні Слонімскай суполкі партыі БНФ Івана Шэгі, заявы на ўключэнне ў склад участковых выбаркамаў, дзе балатуюцца іх людзі, напісалі 26 партыйцаў, прыкладна па два-тры чалавекі на ўчастак.

“Адзін з нашых людзей, Аляксандр Радзевіч, адклікаў сваю заяву, бо ў яго ўзніклі праблемы на працы. Такім чынам, для разгляду ў выканкаме засталося 25 заяваў нашых сяброў. Спадзяемся, каб у камісіі трапіла хоць па адным нашым чалавеку на ўчастак”, — зазначыў Іван Шэга.

Прыхільнікі іншых дэмакратычных прэтэндэнтаў на кандыдаты ў дэпутаты таксама падалі заявы на свой уваход у склад участковых камісій.

Напярэдадні выхадных дзён і жаночага свята райвыканкам яшчэ не справіўся са стварэннем участковых камісій, канстатаваў спадар Шэга. Спісачны склад гэтых камісій мясцовыя ўлады павінны вызначыць да 10 сакавіка.

Комментарии

Послать комментарий

Читать комментарии