Ілюстрацыйнае фота
Днямі 32-гадовы мастаўлянін адпачываў у адной з забаўляльных устаноў райцэнтра і атрымаў крымінальную справу, паведамляе рэсурс УУС Гродзенскага аблвыканкама.
На дыскатэцы мужчына ўбачыў, што кампанія святкуе дзень нараджэння дзяўчыны. Ён падыйшоў да іменініцы і настойваў, каб яна падаравала яму танец. У гэты момант у размову ўмяшаўся сваяк дзяўчыны і сказаў, што ёй толькі споўнілася 18 гадоў і танцаваць з незнаёмцам яна не пойдзе. Тады адрынуты кавалер адышоўся. Потым, распалены алкаголем, падышоў да сваяка дзяўчыны, які танцаваў, і стукнуў яму кулаком у твар, ад чаго той страціў раўнавагу і ўпаў.
Супрацоўнікі Мастоўскага РАУС устанавілі асобу нападніка і затрымалі яго.
Супраць мужчыны Мастоўскі райаддзел Следчага камітэта ўзбудзіў крымінальную справу па артыкуле “Хуліганства”.