У Слоніме Міжнародны дзень тэатра адзначылі капуснікам, спектаклем і ўганараваннем тэатральных работнікаў

Сваю сустрэчу з гледачом у гэты вечар артысты тэатра пачалі з капусніка пра тэатральнае жыццё. Першым на сцэну падняўся галоўны рэжысёр тэатра Васіль Сявец, які павіншаваў прысутных са святам ды нагадаў, што тэатр — гэта артысты і гледачы разам.

Затым да галоўнага рэжысёра паравозікам з вялікім чамаданам далучыліся артысты і пачалося дзейства пра жыццё тэатра.

У гэтым дзействе на сцэне месцы хапіла і дырэктару тэатра Аляксею Ткачову, і загадчыку аддзела культуры Слонімскага райвыканкама Галіне Данільчык.

Незаўважна капуснік перайшоў у камедыю “Вось табе і гоцаца”.
Па завяршэнні спектакля дырэктар зноў віншаваў прысутных са святам, коратка распавёў пра поспехі свайго тэатральнага калектыву, які, хоць і не без цяжкасцяў, але справіўся з даведзеным тэатру планам па колькасці гледачоў у першым квартале.

Потым Аляксей Мікалаевіч перадаў слова Галіне Васільеўне, якая таксама шчыра віншавала ўсіх са святам, дзякавала артыстам за іх працу, а затым уручала Ганаровыя граматы аддзела культуры лепшым работнікам тэатра.

Што відавочна парадавала працаўнікоў сцэны ў святочны для іх вечар — дык гэта кветкі, падарункі і словы падзякі ад гледачоў, якія выходзілі з залы і віншавалі артыстаў і ўвесь калектыў тэатра за іх працу. Як аказалася, акрамя слонімцаў, на спектаклі ў Слонім прыязджаюць гледачы з суседніх Баранавіч, Дзятлава і Зэльвы.

У Міжнародны дзень тэатра 27 сакавіка артысты слонімскага драмтэатра зноў на некалькі гадзін падаравалі свята для сваіх гледачоў. Дзякуй ім за гэта!