На прэзентацыі "Новага замка" ў Лідзе 9 красавіка
Сяргей Чыгрын уручае прэмію Уладзіміру Васько ў Лідзе
На прэзентацыю ў Ліду прыехалі з Гродна рэдактар альманах Янка Трацяк, пісьменнікі Валянцін Дубатоўка, Ала Петрушкевіч, са Шчучына — Рычард Бялячыц, са Слоніма — Сяргей Чыгрын і Мікола Канановіч, з Дзятлава завітаў Валерый Петрыкевіч, а ў Лідзе гасцей чакалі Станіслаў Суднік, Уладзімір Васько, Іван Буднік, Леанід Лаўрэш, Сяргей Чарняк, бібліятэкары і чытачы.
Станіслаў Суднік і Сяргей Чыгрын
Спачатку гасцей на правах гаспадара прывітаў пісьменнік і кіраўнік мясцовай суполкі сяброў беларускай мовы імя Францішка Багушэвіча Станіслаў Суднік.
Лаўрэат літаратурнай прэміі імя Анатоля Іверса Уладзімір Васько
Пачалася імпрэза з прыемнай урачыстасці — лідскага паэта і пісьменніка Уладзіміра Васько ўганаравалі прэміяй імя Анатоля Іверса, якая была заснавана абласной пісьменніцкай суполкай Гродзеншчыны ў 2019 годзе.
Затым рэдактар альманаха Янка Трацяк распавёў пра працу над выпускам юбілейнага 10 нумару “Новага замка”.
Добрым словам узгадаў Янка Трацяк знаных пісьменнікаў, сталых аўтараў альманаха Аляксея Пяткевіча і Юрку Голуба, якія зусім нядаўна адышлі ў лепшы свет, але працягваюць сваё жыццё ў нашай літаратуры.
Бюст Ларысы Геніюш у лідскай бібліятэцы
Далей кожны з прысутных аўтараў альманаха атрымаў слова. Пісьменнікі абмяркоўвалі змест апошняга нумару, выказваліся пра змены, якія адбыліся з выданнем за гэтыя 10 гадоў. Аўтары чыталі вершы і ўрыўкі з празаічных твораў, узгадвалі калег, якія цяпер далёка і тых, хто пакінуў гэты свет назаўсёды. І амаль у кожным выступленні, так ці інакш, закраналася тэма вайны, якая сёння хвалюе ўсіх нас.
Верш Ларысы Геніюш і беларускі крыж у лідскай бібліятэцы
— Незаўважна прамінулі дзве гадзіны нашай сустрэчы, літаратурны працэс у Прынёманскім краі працягваецца, пішуцца ў нас літаратурныя творы ў самых розных жанрах, выдаюцца літаратурныя альманахі і кнігі, жыве жывое беларускае слова, пішуцца беларускія дыктоўкі, ладзяцца літаратурныя імпрэзы, захоўваецца гістарычная памяць пра мінулае і будуецца мост у нашу беларускую будучыню, — заўважыў у сваім развітальным слове лідскі краязнаўца, пісьменнік і выдавец Станіслаў Суднік.
Фота з архіва аўтара