Шчара ў траўні 2022 года
На паэтычнай хвалі
Першы дзень траўня закоціцца сонцам,
Людзі з маёвак прыбудуць дамоў.
Коціцца Слонімам Шчара бясконца
Міма дзяржаў, пакаленняў, вякоў.
Траўні знікаюць у бездані часу,
Як знік ужо Лойкаў тут Першамай,
Ды хочацца шчасця цяпер і адразу
Кожнаму ў кожны жыццёвы раздрай.
Іса ваду пакрысе зноў губляе,
Намацала Шчара свае берагі.
Нераст у рыбы, і рыба гуляе,
І рыбу цікуюць паўсюль рыбакі.
Так з году ў год, са стагоддзя ў стагоддзе
Жыццё паўтараецца зноў на зямлі
У травах, у рыбах, у нашым народзе,
Які з веку ў век шчасце хоча знайсці…
Першы дзень траўня закоціцца сонцам,
Вернуцца людзі з маёвак дамоў.
Плыве наша Шчара праз Слонім бясконца
Міма дзяржаў, пакаленняў, вякоў.
01.05.2022 Слонім