Сяргей Чыгрын
Вокладка новай кнігі Сяргея Чыгрына
Кніга для дзяцей выдадзена накладам 1600 асобнікаў. Па сённяшнім часе гэта вялікі наклад.
З нагоды выхаду новай кнігі карэспандэнт партала gs.by задаў аўтару некалькі пытанняў.
— Сяргей Мікалаевіч, дык пра што распавядуць бацька камень і бацька сын беларускім дзецям у тваёй новай кнізе?
— Кніжка “Камень-бацька і камень-сын” выйшла з друку пад рубрыкай “Беларускія пісьменнікі – дзецям”. У выданне ўвайшлі легенды і паданні Слонімшчыны, Зэльвеншчыны і Дзятлаўшчыны, якія я збіраю шмат дзясяткаў гадоў, апрацоўваю іх, дапаўняю, раблю іх цікавымі і лёгкімі для чытання. У кнізе змешчана каля 70 легендаў і паданняў. Ёсць там і легенды пра нашы вёскі Чамяры, Яруцічы, Сурынку, Клепачы, Жыровічы, Збочна, Бярдовічы, Бракава, Акунінава і г.д.
— Як будзе распаўсюджвацца гэтая кніга?
— Кніга выйшла ў дзяржаўным выдавецтве, таму яна будзе распаўсюджвацца праз Белкнігу і трапіць ва ўсе крамы Беларусі. Я думаю, што і ў Слонім – абавязкова.
— Ці плануеш надалей пісаць і выдаваць кнігі для дзяцей?
— Гэта ўжо другая мая кніга для дзяцей. Першая кніжка вершаў “Слонік і гармонік” свет пабачыла летась у Гомелі. Там рыхтуецца і новая кніга дзіцячых вершаў “Васілёк і кісялёк”, якая сёлета выйдзе з друку. “Слонік і гармонік” хутка раскупілі бібліятэкі. Дзве дзіцячыя кнігі вершаў да друку запланаваны сёлета і ў дзяржаўных мінскіх выдавецтвах. Так што я, неяк непрыкметна, стаў і дзіцячым аўтарам. Хаця для дзяцей пісаць вельмі няпроста. Але гэта такая мая творчая размінка паміж гісторыка-краязнаўчай працай.
— Над чым цяпер працуеш?
— Працы творчай хапае. Адначасова працую над некалькімі гісторыка-краязнаўчымі выданнямі, сярод якіх будзе вялікі том пра Слонім лепшых маіх ранейшых артыкулаў, кніга пра Клецкую беларускую гімназію, складаю літаратукрную спадчыну паэта з Навагрудка Самсона Пярловіча і шмат маю іншых творчых клопатаў.