Пасля сутыкнення з аўтобусам у Карэліцкім раёне кіроўцу “Аўдзі” знайшлі за 30 метраў ад машыны

«Аўдзі» пасля сутыкнення

Каля 23.00 супрацоўнікі ДПС на ўскрайку гарадскога пасёлка Карэлічы заўважылі падазроны бесперапынны рух аўтамабіля “Аўдзі” па коле.

Інспектары ўключылі праблісковыя маячкі і вырашылі спыніць машыну. Аднак кіроўца праігнараваў патрабаванне спыніцца і павялічыў хуткасць руху.

Выехаўшы з гарпасёлка, на аўтадарозе “Карэлічы – Валеўка – Наваельня” кіроўца “Аўдзі” амаль адразу сутыкнуўся з аўтобусам сельгаспрадпрыемства.

У кювеце

У выніку ДТЗ 21-гадовы жыхар Гродна памёр у рэанімацыйным аддзяленні мясцовай бальніцы. Пры сутыкненні з аўтобусам хлопец не быў прышпілены пасам бяспекі. Яго знайшлі на адлегласці 30 метраў ад машыны.

У якім стане знаходзіўся кіроўца “Аўдзі” ў момант ДТЗ, павінна ўстанавіць праверка, адзначае рэсурс абласной ДАІ.

У аўтобусе ніхто траўмаў не атрымаў.

Фота ДАІ