Грыбнікоў дасталі з балота выратавальнікі
Вечарам 8 кастрычніка карэліцкім выратавальнікам паступіла паведамленне, што ў лесе каля вёскі Міранка згубіліся два чалавекі. Супрацоўнікі МНС накіраваліся ва ўказаным накірунку, канстатуе рэсурс выратавальнікаў.
Стала вядома, што двое маладых людзей пайшлі ў лес па грыбы, а потым патэлефанавалі знаёмым і паведамілі, што згубілі арыенцір і самастойна з лесу выйсці не могуць.
Выратавальнікі падтрымлівалі з пацярпелымі мабільную сувязь і падавалі гукавыя сігналы. Байцы МНС устанавілі, што маладыя людзі загразлі ў балоце і самастойна выбрацца не могуць. Вызначыўшы месца іх знаходжання, работнікі МНС спусціліся да мужчын з дапамогай выратавальнай дошкі і выцягнулі іх з балота.
Медыцынская дапамога выратаваным не спатрэбілася, адзначаецца ў паведамленні.
Фота МНС