У Слоніме ўрачыста адкрылі рэгіянальны фестываль «Паланэз: ад вытокаў да адраджэння – 2026»

Слонім невыпадкова стаў месцам правядзення фестывалю. Горад, цесна звязаны з імем роду Агінскіх, здаўна славіўся музычнымі і тэатральнымі традыцыямі. У часы Міхала Казіміра Агінскага Слонім называлі «паўночнымі Афінамі» — тут дзейнічаў адзін з лепшых у Еўропе тэатраў, працавалі вядомыя архітэктары, кампазітары, спевакі, артысты тэатра і балета.

Асаблівае месца ў гісторыі горада займае паланэз. Менавіта ў Слоніме кожны дзень апоўдні гучыць мелодыя, якая нагадвае пра славутую музычную спадчыну Агінскіх і стала своеасаблівым сімвалам горада.

На адкрыцці фестывалю гасцей і ўдзельнікаў віталі прадстаўнікі мясцовай улады і сферы культуры. Сярод іх — старшыня Слонімскага раённага Савета дэпутатаў і раённага аддзялення Беларускай партыі «Белая Русь» Алег Таргонскі, намеснік старшыні Слонімскага райвыканкама Тэрэса Юшкевіч, начальнік аддзела культуры Галіна Данільчык, а таксама намеснік начальніка аддзела ідэалагічнай работы і па справах моладзі Наталля Грасевіч.

З прывітальным словам да прысутных звярнулася намеснік старшыні Слонімскага райвыканкама Тэрэса Юшкевіч. Яна адзначыла ўнікальнасць гісторыка-культурнай спадчыны Слонімшчыны і падкрэсліла, што горад займае асаблівае месца ў культурным жыцці краіны.

«Слонімскі край — гэта цудоўная зямля з непаўторнай гісторыка-культурнай спадчынай. Асаблівасць нашай зямлі ў тым, што яна звязана з сям’ёй Агінскіх, якіх ведаюць ва ўсім свеце. І толькі ў нашым горадзе кожны дзень у дванаццаць гадзін гучыць такая цудоўная і непаўторная музыка — паланэз», — адзначыла Тэрэса Юшкевіч.

Яна пажадала ўдзельнікам фестывалю яркіх уражанняў, поспехаў, новых сяброў і натхнення, а таксама выказала спадзяванне, што з кожным годам фестываль будзе развівацца і збіраць усё больш удзельнікаў.

Пасля ўрачыстай часткі ўдзельнікаў запрасілі далучыцца да святочнага шэсця, якое прайшло да Слонімскага раённага цэнтра культуры. Менавіта там распачалася конкурсная праграма фестывалю.